Brezhoneg er gêr

Evit astenn ar soubidigezh e brezhoneg a vez er skol e c’hall an dud tro-dro d’ar vugale reiñ digarezioù ouzhpenn dezho da ober gant ar brezhoneg.  Ar mennozh pennañ eo pikañ o c’huriusted ha degas c’hoant dezho. Hag ober m’o do plijadur gant ar yezh !

> LENN > SELAOU & KANAÑ > C’HOARI > SELLOUT OUZH AR SKRAMM

Aliesoc’h-alies e vez divizet gant kerent yaouank zo deskiñ brezhoneg pa grog skoliadur o bugale. Kempoell eo an diviz ha da-heul e vo pinvidikoc’h buhez an tiegezh. Gant DAO (Deskiñ d’an oadourien), kevredad an aozadurioù deskiñ brezhoneg evit an dud gour, o do alioù fur.

Lod eus tud ar vugale a vourro gant levrioù pleustrek, hag a implijo anezho evel ma reer gant levrioù keginañ : 

• Je parle breton à mon enfant, suivi de Petit vocabulaire parental de puériculture, Mark Kerrain Sav-heol, 2010
• Yezh ar vugale - Le breton des enfants et des tout-petits, Hervé Le Bihan & Soaz An Tieg, An Alarc'h Embannadurioù, 2005
• Help ! mon enfant parle breton : Kit pour parents de petits bilingues, Katell Léon, Le Temps, 2018
• Kaozeit brezhoneg gant ho pugale – Parlez breton à vos enfants, pleg-displeg Al levrig, 2001
• Bemdez ur frazenn ouzhpenn - 365 phrases de la vie quotidienne en breton, pleg-displeg Ofis ar brezhoneg
• Bugaligoù – Petite enfance, geriaoueg 120 ger diazez, Ofis ar brezhoneg
• Breton, le guide de conversation des enfants, embannet gant Bonhomme de chemin ha Skol an emsav, 2019

Talvoudus e vez atav kaout ur geriadur brezhoneg pe brezhoneg-galleg e-kichen geriadur Larousse pe Robert. Gant meur a embanner e c’haller kaout anezho : al Liamm, an Here, Palantines, Skol Vreizh, Yoran.

Setu ar bihanig gant e vloavezh-skol kentañ hag e karfe deoc’h e vefe en ti lod eus an traoù eo boas da welet er skol. E-touez al levrioù anavezet mat emañ ar skeudennaoueg Mes mille premiers mots en breton, ul levr gwevn e c’holo hag a servijo ivez d’ar gerent da glokaat o geriaoueg.

Ar pladennoù rimadelloù a zeuio dindan un nebeud sizhunvezhioù da vezañ lod eus buhez ar re vihan, ha mouskanet e vint ganto a-hed o buhez.

Evit gouzout diouzh an embannadurioù diwezhañ sellit ouzh "korn tud ar vugale " er blog webklas.

Prest oc’h ? Krogit !