Adkenfinañ : ijin zo e Diwan

27/11/2020

Abaoe an 2 a viz Du hag an diarbennoù yec’hedel kreñvaet e kendalc’h Diwan gant e strivoù evit doujañ d’ar protokol penn-da-ben ha degemer ar skolidi e surentez. Daoust d’ar mare bezañ diaes evit an holl n’eo ket an dud digalonekaet en hor skolioù pa ‘z eont betek ijinañ obererezhioù nevez zoken.

Emgavioù eus a bell...

E meur a skol e oa bet ranket nullañ dorioù digor miz Du, setu deuet ar mennozh mat gant ar skipailhoù aozañ dorioù digor eus a bell ! :

E skol Rianteg, etre ar 16 hag an 20 a viz Du o doa gellet ar gerent sevel goulennoù da geñver ur pellbrezegenn ha sellet ouzh videoioù kinnig war al lec’hienn internet.
Aozet oa bet gant skol Naoned ur mintinvezh dorioù digor dre bellemvod d’an 21 a viz Du evit eskemm gant ar familhoù dedennet.
Prest e oa skol Gwened e miz Even pa oa bet prientet d’ar c’houlz-se ur video kinnig ar skol.
Goude bezañ ranket kas pelloc’h o emvod meur, setu divizet gant skol Brest degas un tamm nevezadur oc’h aozañ an darvoud-mañ dre bellemvod d’an 29 a viz Du.

... Gwerzhioù da gas d’ar gêr...

Dre m’eo bet nullet an darvoudoù (foarioù, marc’hadoù…) eo lakaet ar skolioù diaes a-fed an arc’hant pa ‘eo an obererezhioù-mañ a zegas dezho ar muiañ a arc’hant. Met n’eo ket ar mennozhioù a vank gant an AEPoù ha kuzulioù skoazell ijinañ doareoù all da zastum arc’hant ! :

Gwerzh jug avaloù (Plounevez-Moedeg), gwez sapr (Rianteg, Kastell-Paol, Pempoull), kig ha farz da gas d’ar gêr (Kommanna), gwerzh pizzaioù da gas d’ar gêr (Kemper), ...
E Kastellin, un taol fall eo bet evit an aozerien nullañ ar marc’had Artisan’Art pa oant boas da zastum 8 000 € evit ar skol. Neuze ez eus bet aozet ur c’houlzad profoù gant ar c’huzul skoazell hag ur veaj da c’hounit ivez d’an dennadeg.
E Gwengamp ez eo Foar al Levrioù a zo o paouez bezañ nullet met kinnig a ra ar skol ur click and collect eus levrioù e brezhoneg evit ar re yaouank, seier, pegsunioù, deiziadurioù... Ur c’houlzad arc’hantaouiñ zo bet lañset ivez war ar bajenn Facebook, met ivez un dastumadeg c’hoarioù eil dorn evit ar Restos du Cœur.

… Ha raktresoù krouiñ er skolioù

En tu all d’an diarbennoù yec’hedel nevez da ober ganto e vez nullet ivez obererezhioù er maez eus ar skol, degemer tud a-vicher, raktresoù, abadennoù... Kement abeg evit ijinañ ar raktresoù pedagogel ha/pe buheziñ en-dro :

Troet he deus ur skolaerez eus Banaleg e brezhoneg ur ganaouenn war ar gwalc'hiñ daouarn "digovid", ur mennozh mat eo evit deskiñ d’ar re vihan en un doare dudius pegen pouezus eo ar yec’hederezh er mare-mañ !
E skol Rianteg ez eus bet ranket nullañ an arvestoù sonerezh met kenderc’hel a ra da genlabourat gant ar skol sonerezh Sonam' gant stalioù er skol.
E Plabenneg ez eus bet ijinet gant ar c’huzul skoazell ur c’hlask teñzor da bellgargañ “Jakez Sparrow” evit 5€. Un obererezh kaer evit ar vugale e-kerzh ar c’henfinañ, hag evit souten ar skol war un dro !
En eil derez e vez degemeret ar c’hlasoù bep eil sizhun evit chom hep bezañ re niverus. Hag er skolajoù, n’eo ket ijin a vank evit tremen an abardaevezh : e Plijidi e vez aozet blind-test sonerezh peotramant stalioù kinklañ, hag e Sant-Ervlan e vez aozet un obererezh tresañ evit ar 5vedidi.