Brezhoneg en divskouarn

Ar yezhoù zo graet da seniñ ha da ganañ. Ar brezhoneg a ganer hag a ziskaner ouzhpenn, ha c’hoazh war seizh ton e rannyezhoù. Peadra da zic’hoantañ hon divskouarn.

Radioioù

Bemdez e c’haller klevet brezhoneg er radio gant an FM, war Internet pe gant podskignadoù. Radio Breizh eo ar porched a zigor war meur a radio brezhonek (Arvorig FM, Radio Kerne, Radio Bro Gwened, Radio Naoned, Radio Kreiz Breizh) ha gant France Bleu Breizh Izel e vez kinniget meur a abadenn ha ivez keleier pemdeziek e brezhoneg. War lec’hienn Teatr Piba e c’haller selaou digoust meur a grouadenn faltazi evit ar radio.

Rimadelloù

Dibosupl eo tremen hebioù ar rimadelloù evit ar re vihan :

1, 2, 3, rimadelloù a ri ! Ti embann ar skolioù (2012), ul levr, daou CD, 140 rimadell.
1, 2, 3, kanañ a ri ! Ti embann ar skolioù (2018), levr-CD, 55 kanaouenn
Mona Jaouen : Kanit Bugaligoù (2006), Heitou (2011)
Balafent, Ubapar, 2014
Dibedibedañchaou, Yann-Fañch Kemener, Dastum, 2000
Loened fur ha foll, Morwenn Le Normand & Roland Conq, Coop Breizh, 2017
Kanaouennoù brudet Jean-Luc Roudaut !
ha dastumad Brezhoweb !

Er pennad Lenn e kavoc’h alioù war levrioù da selaou, ha mat e vo menegiñ ouzhpenn ivez ar veaj dre ar sonerezh Kan ar Bed gant Bannoù Heol, deuet er maez e 2018.

Ar c’hanaouennoù graet ganto

Plijout a ra kanaouennoù ar vugale d’ar vugale ! Heñvel an traoù gant ar grennarded. Moarvat e kemeront perzh gant o c’hlasad e Kan ar Bobl hag o zroiadoù kanañ a gavoc’h war ar rouedadoù sokial (Facebook ar skol, Youtube).

Ingal e vez produet gant skol pe skol ur bladenn, ur ganaouenn pe ur c’hlip gant ar vugale. E-touez ar re ziwezhañ graet e c’haller ober anv eus Re gozh eo an douar, album skolidi Gwengamp gant Jérôme Ollivry, Etre Glas ha Melen hini skolajidi ar Releg gant Brieg Guerveno, raktres skolidi ar Faou war Eusa gant Yann Tiersen pe kanaouenn ha klip skolajidi Plijidi gant Krismenn ha Bastian Gwilhous. Diouzh ar plijusañ eo ivez kanaouennoù Perynn, bet skoliadez e Diwan.

Istorioù ha kontadennoù

Boued evit an divskouarn zo ivez gant ar yezh dre gomz, hini ar c’hontadennoù hag ar beilhadegoù. War an dachenn-se emañ war ar renk kentañ ar gevredigezh Dastum : ganti e c’haller kaout boued da selaou en linenn (a dizher war o lec'hienn pe dre Bretania) ha ganti e vez aozet ivez beilhadegoù goañv ma vez treuzkaset ar yezh a rumm da rumm, un dudi.

> Kinnigoù ho peus da ober evit klokaat kement-se ? Skrivit deomp : demat@diwan.bzh