Diwan enepbonreizhel !
Seziz lezenn Molac : Diwan en arvar
21/05/2021
Mantret ha kounnaret eo izili ar rouedad Diwan war-lerc’h embannadur disoc’h seziz ar c‘huzul vonreizh war al lezenn Molac. Daoust ma ‘z omp kontant da c’houzout e vo dalc’het an divizoù a-fed ar skodenn skol omp sebezet diwar-benn an diviz war ar soubidigezh a nac’h ar bedagogiezh-mañ kenkoulz er skolioù publik hag er skolioù kevratet !
Ar pezh a dalv e vefe Diwan ha rouedadoù all ar skolioù kevredigezhel dre soubidigezh enepbonreizhel. Un distro 50 vloaz en a-dreñv…nac’hañ kevratañ hor skolioù, nac’hañ ar skodenn skol, lemel postoù deskadurezh stad, setu an efedoù a c’hellfe c’hoarvezout gant ur soubidigezh enepbonreizhel.
Gant ar seziz-mañ lañset gant Blanquer en deus ar ministr digoret bras boest Pandore pa teu da vezañ Diwan hag ar rouedadoù dre soubidigezh er-maez lezenn hag en arvar an hentenn dre soubidigezh a reer ganti abaoe ouzhpenn 50 vloaz.
Goulenn a reomp gant ar gouarnamant ha gant ar gannaded bezañ prest da sklaeraat stad an traoù, mod all ne c’hello ket Diwan mirout ouzh ar gounnar da sevel.
C’hoant hon eus menegiñ al lusk kaer a zo bet krouet tro-dro d’ar yezhoù rannvro, gant ar strollad « Evit ma Vevo hor Yezhoù » hag « Unanet Evit ar Brezhoneg » ha kenderc’hel a raimp da vont war-raok gant nerzh, youl hag unvaniezh evit ma vo anavezet hor yezhoù ha hon hentennoù ha diwar-se kaout ar peadra da virout anezho.
Gervel a reomp hor bugale, hon tud, an dud a-youl vat, hor skolaerien, hon implijidi nann gelennerien hag an dud tost o c’halon ouzh Diwan da zont d’an 29 a viz Mae da 1eur30 da Gwengamp evit saveteiñ hon hentenn lakaet mat en arvar ha mirout hor pinvidigezhioù boutin ma ‘z eo ar brezhoneg hag ar yezhoù rannvro !
Betek an trec’h !
