Skodenn ar c’humunioù evit ar c’helenn divyezhek zo bet lakaet e pleustr da vare an distro-skol 2019

Gant al lezenn « evit skol ar fiziañs  », e vez graet lezenn Blanquer anezhi, ez eus bet votet un diarbenn nevez a sell ouzh skodenn  skol ar skolioù Diwan. An diarbenn-mañ zo bet lakaet e pleustr da vare an distro-skol 2019 ; n’eus ket ezhomm da embann dekredoù arverañ peogwir emañ resis a-walc’h al lezenn. Hiviziken e vo roet skodenn skol ar c’humunioù “diouzh un emglev” etre kumun ar skolidi hag ar skol a zo ur c’helenn divyezhek enni (gant ma ne vo skol divyezhek ebet e kumun ar skolidi). Ma ne vez kavet emglev ebet e vo bodet gant dileuriad ar Stad, maer kumun ar skolidi hag un den e-karg eus ar skol evit ma vo kavet un diskoulm “evit mad ar vugale skoliataet”.

Eus kalz a gumunioù e teu skolidi Diwan : un dachenn etrekumuniel eo hini ar skolioù Diwan. E-pad pell ez eus bet meret ul lodenn eus kargoù ar skolioù gant kumunioù a zo ur skol divyezhek enno ha kumunioù annez ar skolidi ne roent ket o lod. E 2015 oa bet votet ul lezenn evit aesaat paeamant skodenn skol ar c’humunioù evit skolidi eus an hentenn bublik divyezhek.

Gant an diarbenn nevez votet e 2019 e vo gellet arc’hantaouiñ ha derc’hel padus implijidi nann-gelennerien ar skolioù lakaet en arvar gant fin ar c’hevratoù sikouret e 2017. Dre ma eo start lakaat e pleustr an traoù e oa bet bodet tud e-karg eus ar skolioù e-kerzh miz Mezheven evit kemer perzh en un stal-labour stummadur aozet gant Diwan. Stalioù-labour all zo raktreset da-geñver kuzul ar skolioù, skolajoù ha lise met ivez da-geñver an devezh Eskemm (stummadur tud a youl vat) e miz Du.

Adalek miz Here eo bet kroget gant ar skolioù an difraeoù war-zu ar c’humunioù evit ar skodenn skol. Er memes koulz e vez heuliet an teuliad gant prezidantez ha renerez ar rouedad asambles gant servijoù ar Stad ha kuzul rannvro Breizh.