Ar c’huzul skolaj pe lise

E penn kentañ ar bloavezh-skol e vez aozet gant ar rener·ez dilennadegoù dre vilhedoù kuzh evit kaout daou pe dri dileuriad eus ar skipailh kelenn (da zeiz ar rak distro-skol pe e-kerzh miz Gwengolo) ha daou pe dri dileuriad eus ar familhoù (da-geñver an emvod meur, e penn kentañ ar bloavezh skol diouzh boaz). Reiñ a ra kefridi da bep penngelenner lakaat dilenn dileuridi ar c’hlasad ; divizout a ra an dileuridi an doare ma kemerint perzh er c’huzul.

Bodañ a raio ar rener·ez ar c’huzul skolaj pe lise div wech ar bloaz da nebeutañ, aliesoc’h diouzh ret. E-touez tachennoù plediñ ar c’huzul skolaj pe lise emañ : votiñ war ar raktres skol hag ar reolennaoueg diabarzh, eskemm diwar-benn buhez ar skolaj pe al lise. Da-heul pep emvod en·he deus karg ar rener·ez da embann ar rentañ-kont divyezhek hag a vez kaset da familhoù ha da izili ar skipailh kelenn.